| Islamic Knowledge Hub

حج تمتع ایک نظر میں

حج تمتع حج کی تین اقسام میں سے سب سے مقبول اور آسان ترین قسم ہے، جس میں ایک ہی سفر کے دوران عمرہ اور حج دونوں الگ الگ احرام کے ساتھ ادا کیے جاتے ہیں۔ پہلے عمرہ کا احرام باندھنا اور طواف و سعی کے بعد بال کٹوانا اور احرام کھول دینا۔ پھر دوبارہ حج کی نیت سے ۸ ذو الحجہ کو احرام باندھنا اور مناسک حج ادا کرنا۔

عمرہ

غسل کرنا

احرام سے پہلے غسل کرنا مسنون اور مستحب عمل ہے تاکہ پاکیزگی حاصل ہو۔

خوشبو لگانا

احرام باندھنے سے پہلے جسم پر خوشبو لگانا مسنون ہے (لیکن احرام کے کپڑوں پر خوشبو نہ لگائیں)۔

احرام باندھنا اور چپل پہننا

مرد حضرات دو عدد اَن سلِی (بغیر سلی ہوئی) سفید چا دروں میں احرام باندھیں اور چپل پہنیں۔عورتوں کا معمول کا لباس ہی ان کا احرام ہے۔ چپل ایسی پہنیں جس سے قدم کا ابھرا ہوا حصہ کھلا رہے۔

گھر ، ایئر پورٹ یا میقات پہنچ کر عمرے کی نیت کرنا

میقات پر پہنچ کر مسنون الفاظ سے نیت کریں:

لَبَّيْكَ اَللّٰهُمَّ بِعُمْرَة

’’اے اللہ میں حاضر ہوں عمرہ کے ساتھ‘‘

ہندو ستان سے جانے والے حجاج کے لئے یلملم میقات ہے۔ فلائٹ کے روانہ ہونے کے بعد یلملم کراس کرنے کے پہلے نیت کے الفاظ اداکر لیں ۔ نیت کے الفاظ کی ادائیگی سے آپ مُحْرَمْ ہو گئے اور آپ پر احرام کی پابندیاں عائد ہوگئیں ۔

میقات پر پہنچتے ہی تلبیہ پڑھنا شروع کر دینا

میقات پر پہنچنے کے بعد سے تلبیہ پڑھنا شروع کر دیں ۔ تلبیہ کے الفاظ یہ ہیں :

لَبَّيْكَ اللَّهُمَّ لَبَّيْكَ لَبَّيْكَ لَا شَرِيكَ لَكَ لَبَّيْكَ إِنَّ الْحَمْدَ وَالنِّعْمَةَ لَكَ وَالْمُلْكَ لَا شَرِيكَ لَكَ

ترجمہ: ’’اے اللہ میں حاضر ہوں آپکا کوئی شریک نہیں ہے میں حاضر ہوں بلا شبہ تمام عریف اور تمام نعمتیں آپ کے لیئے ہے اور حکومت و سلطنت آپ کی ہے آپ کا کوئی شریک نہیں۔‘‘ مرد تلبیہ آواز سے پڑھیں اور عورتیں آہستہ پڑھیں۔

مکہ مکرمہ ہوٹل سے حرم شریف آنا

مکہ مکرمہ پہنچ کر ہوٹل میں سامان رکھیں اور طہارت کے ساتھ مسجد الحرام کا رخ کریں۔

مسجد حرام میں داخل ہوتے وقت دعاء پڑھنا

مسجد حرام میں داہنے پاؤں سے داخل ہوں اور یہ دعاء پڑھیں :

بِسْمِ اللّٰهِ وَالصَّلَاةُ وَالسَّلَامُ عَلٰى رَسُوْلِ اللّٰهِ اَللّٰهُمَّ افْتَحْ لِىْ أَبْوَابَ رَحْمَتِكَ

ترجمہ:’’ اللہ کے نام کے ساتھ( داخل ہوتا ہوں) اور درود و سلام ہو رسول ﷺ پر۔ اے اللہ! میرے لیےاپنی رحمت کے دروازے کھول دے۔‘‘

وضو کر کے طواف شروع کرنا

طواف کے لیے باوضو ہونا ضروری ہے۔ باوضو ہو کر طواف کا آغاز کریں ۔

طواف شروع کرنے سے پہلے تلبیہ پکار نا بند کر دینا

طواف کا پہلا چکر شروع کرتے وقت تلبیہ موقوف کر دیں اور اضطباع یعنی دائیں کندھے سے احرام کی چادر ہٹا کر طواف کریں۔

طواف کی آغاز حجر اسود کے سامنے سے استلام کے ساتھ شروع کرنا

حجر اسود کے بالمقابل کھڑے ہو کر بسم اللہ، اللہ اکبر کہہ کر استلام کریں اور طواف شروع کریں۔

پہلے تین چکر میں رمل کرنا یعنی کندھے اکڑا کر تیز تیز چلنا

مرد حضرات طواف کے پہلے تین چکروں میں کندھے ہلا کر پہلوانوں کی طرح تیز قدموں سے چلیں۔

طواف کے سات چکر پورے کرنا

خانہ کعبہ کو اپنے بائیں جانب رکھتے ہوئے سات چکر مکمل کریں۔

رکن یمانی اور حجر اسود کے درمیان مسنون دعاء کرنا

طواف کے چکروں کے دوران اللہ کا ذکر کریں اور خوب دعائیں کریں۔ رکن یمانی اور حجر اسود کے درمیان یہ دعاء پڑھیں :

رَبَّنَا آتِنَا فِي الدُّنْيَا حَسَنَةً وَفِي الآخِرَةِ حَسَنَةً وَقِنَا عَذَابَ النَّارِ

مقام ابراہیم کے پاس مخصوص قرآن کی آیت پڑھنا

جب آپ طواف کے ۷ چکر مکمل کر لیں، تو حجرِ اسود کا آخری بار استلام کریں اور پھر مقامِ ابراہیم کی طرف بڑھتے ہوئے بلند آواز سے یہ قرآنی آیت پڑھیں:

وَاتَّخِذُوا مِنْ مَقَامِ إِبْرَاهِيمَ مُصَلًّى

طواف مکمل کرنے کے بعد مقام ابراہیم کے پاس دور کعت نماز پڑھنا

طواف مکمل کر لینے کے بعدمقامِ ابراہیم کے پاس ۲ رکعت نماز ادا کریں۔اگر وہاں جگہ نہ ملے تو مسجدِ حرام میں کہیں بھی یہ نماز ادا کر لیں۔

نماز میں مسنون سورت پڑھنا

پہلی رکعت میں سورۃ فاتحہ کے بعد سورۃ الكافرون اور دوسری رکعت میں سورۃ فاتحہ کے بعد سورۃ الاخلاص پڑھنا مسنون ہے۔

نماز کے بعد آب زمزم پینا

نماز کے بعد قبلہ رخ ہو کر کھڑے ہو کر پیٹ بھر کر آب زمزم پئیں اور دعاء کریں۔

سعی کرنا

صفا سے سعی کا آغاز کریں اور مروہ تک جائیں۔ صفا سے مروہ ۱ اور مروہ سے صفا۲ کرتے ہوئے سات شوط مکمل کریں۔سعی کے درمیان یہ دعاء پڑھیں : ۔

رَبِّ اغْفِرْ وَارْحَمْ وَأَنْتَ الْأَعَزُّ الْأَكْرَمُ

ترجمہ:’’اے میرے رب! مجھے بخش دے اور مجھ پر رحم فرما، تو ہی سب سے زیادہ عزت والا اور بزرگی والا ہے‘‘۔

بال کٹوانا

سعی مکمل ہونے کے بعد مرد تمام سر کے بال منڈوائیں یا کٹوائیں، اور خواتین ایک پور کے برابر بال کاٹیں۔

احرام کھول دینا

بال کٹوانے کے بعد عمرہ مکمل ہو گیا۔ اب احرام کھول کر عام لباس پہن لیں۔

حج

۸ ذو الحجہ (یوم الترویہ)

اپنے رہائش گاہ (ہوٹل) پر غسل کرنا

۸ ذوالحجہ کو ہوٹل میں ہی حج کے احرام کے لیے غسل کریں۔

خوشبو لگانا

احرام کی نیت سے پہلے جسم پر خوشبو لگائیں۔

احرام باندھنا

حج کے لیے احرام کی دو چادریں زیب تن کریں۔

حج کی نیت کرنا

ان الفاظ میں حج کی نیت کریں :

لَبَّيْكَ حَجًّا

پھر یہ مسنون دعاء پڑھیں:

اللَّهُمَّ حَجَّةٌ لَا رِيَاءَ فِيهَا وَلَا سُمْعَةَ

’’ اے اللہ! یہ ایسا حج ہے جس میں نہ ریا کاری ہے اور نہ شہرت ‘‘۔ اس کے بعد فوراً بلند آواز سے تلبیہ پڑھنا شروع کر دیں

زوال آفتاب سے پہلے منی کے لیے روانہ ہونا

۸ ذوالحجہ کو زوال سے پہلے منیٰ کے لیے روانہ ہوں۔

منی پہنچ کر ظہر، عصر، مغرب اور عشاء کی نماز قصر ادا کرنا

منیٰ میں ظہر، عصر، مغرب اور عشاء کی نمازیں اپنے اپنے وقت پر قصر کر کے پڑھیں۔

۹ ذو الحجہ (یوم عرفہ)

سورج نکلنے کے بعد تلبیہ پڑھتے ہوئے عرفات کے لیے روانہ ہونا

۹ ذوالحجہ کی صبح سورج طلوع ہونے کے بعد تلبیہ پڑھتے ہوئے میدان عرفات کی طرف جائیں۔

میدان عرفات میں جبل رحمت کے قریب ٹھہرنا

میدان عرفات میں جہاں جگہ ملے ٹھہریں، ممکن ہو تو جبل رحمت کے قریب قیام کریں۔

ظہر اور عصر کی نماز اکٹھا کر کے قصر ادا کرنا اور مغرب تک خوب دعائیں کرنا

عرفات میں ظہر کے وقت ظہر اور عصر کی نمازیں جمع و قصر کر کے پڑھیں اور غروب آفتاب تک دعاؤں میں مشغول رہیں۔

سورج غروب ہونے کے بعد مغرب کی نماز پڑھے بغیر مزدلفہ کے لیے روانہ ہو جانا

غروبِ آفتاب کے بعد بغیر مغرب پڑھے سکون کے ساتھ مزدلفہ کے لیے روانہ ہوں۔

مزدلفہ پہنچ کر مغرب و عشاء کی نمازیں جمع کر کے قصر ادا کرنا

مزدلفہ پہنچ کر عشاء کے وقت میں مغرب اور عشاء کی نمازیں ایک اذان اور ایک اقامت کے ساتھ جمع کر کے پڑھیں۔

جمرات کو مارنے کے لیے کنکریاں چن لینا

مزدلفہ میں رات قیام کے دوران جمرات کے لیے چنے کے برابر کنکریاں چن لیں۔

۱۰ ذو الحجہ (یوم النحر)

نماز فجر کے بعد سورج نکلنے سے پہلے تلبیہ کہتے ہوئے منی واپس آ جانا اور بڑے جمرہ کو سات کنکریاں مارنا

فجر کے بعد وقوفِ مزدلفہ کر کے منیٰ آئیں اور جمرہ عقبہ (بڑے جمرہ) کو سات کنکریاں ماریں، ہر کنکری پر “اللَّهُ أَكْبَرُ” کہیں۔

قربانی کے لیے دیے گئے وقت کے بعد حلق کروانا

قربانی کے بعد سر منڈوائیں (حلق) یا بال کٹوائیں (تقصیر)۔ اب احرام کی پابندیاں ختم ہو گئیں۔

طواف زیارت کے لیے خانہ کعبہ جانا

مکہ مکرمہ جا کر حج کا فرض “طوافِ زیارت” ادا کریں۔

خانہ کعبہ میں طواف اور سعی کے بعد واپس منی آ جانا

طوافِ زیارت کے بعد حج کی سعی کریں اور رات قیام کے لیے واپس منیٰ آ جائیں۔

۱۱، ۱۲، ۱۳ ذوالحجہ (ایام تشریق)

منی میں تینوں دن راتیں گزارنا

ایامِ تشریق کی راتیں منیٰ میں گزارنا سنتِ مؤکدہ / واجب ہے۔

ان تین دنوں روزانہ زوال کے بعد تینوں جمرات کو کنکریاں مارنا

زوال کے بعد ترتیب سے تینوں جمرات (چھوٹا، درمیانہ، اور بڑا) کو سات سات کنکریاں ماریں۔

۱۲ یا ۱۳ ذوالحجہ کو سورج غروب ہونے سے پہلے منی کے حدود سے نکل کر ہوٹل چلے جانا

اگر ۱۲ ذوالحجہ کو جانا چاہیں تو غروبِ آفتاب سے پہلے منیٰ کی حدود سے نکل جائیں۔

حج کے بعد وطن واپسی کے وقت طواف وداع کرنا اور حرم شریف سے باہر نکل جانا

مکہ مکرمہ سے رخصت ہوتے وقت آخری واجب “طوافِ وداع” ادا کریں۔

Previous
حج کے احکام Next
حضرت عامر بن عبدقیس رحمہ اللہ (تابعی)